Arabar Zirkulariak
Barrundiako eta Gasteizeko landa eremuan sortu eta garatzen den kultura-proiektu bat gara, zirkoa eta bitartekaritza kulturala ardatz hartuta. Gure helburua da kultura garaikidea landa eremura hurbiltzea, herritarrak protagonista bihurtuz eta komunitatea erdigunean jarriz.
Proiektuaren oinarrian Arabar zirkularien eta herrietako bizilagunen arteko elkarlana dago. Sormen-prozesu partekatuen bidez, elkarrizketa, parte-hartzea eta harremanen zaintza lantzen ditugu, artea topagune bihurtuta. Zirku-diziplinak gorputza, emozioak eta pentsamendua mugiarazteko tresna dira guretzat, eta horien bidez bakardadea, elkarbizitza eta elkartasuna bezalako gaiak jorratzen ditugu.
Herriz herri lan egiten dugu, adin eta kolektibo desberdinetako pertsonekin elkarlanean: haurrak, gazteak, helduak eta adinekoak. Tokian tokiko errealitateei adi, entzunez eta partekatuz, proiektua komunitate bakoitzaren beharretara egokitzen dugu, prozesua bera emaitza bezain garrantzitsua dela sinetsita.
Kultura gizartea eraldatzeko tresna dela uste dugu, eta landa eremuan ere sorkuntza, harremanak eta bizipoza lantzeko espazioak beharrezkoak direla. Horregatik, gure lana lurraldean errotzen da, epe luzeko harremanak eraikiz, elkarrekin sortuz eta komunitatean bizitzeko beste modu batzuk irudikatuz.